Attivitæ

Attivitæ

Into tempo CLI a l’à promòsso diverse attivitæ ligæ a-a seu miscion; chi de sotta ne femmo unna breve rassegna.

 

Festival da Zeneixitæ - Zena Festival

Evento organizzou pe-a festa de San Zane, 23 e 24 de zugno, in conlaboaçion con l’associaçion Il Ce.Sto., a-i Giardin Luzzati de Zena, l'anno 2017, e da l'11 a-o 13 de mazzo, l'anno 2018.

fest

Muxica, tiatro, conferense, loueui pe-i figgeu e tanto atro, o primmo "Festival della Genovesità - Festival da Zeneixitæ" o l’è stæto un successo de pubrico e de entuxasmo. A lengua e a cultua zeneixi rappresentæ into parcoscenico o ciù zoeno e centrale di Caroggi, à l’insegna de l’avertua e do multiculturalismo.

Da-o Torneon de Cirolla a-a töa rionda (in zeneise) in sciô tema de l’identitæ liquida, da-i conçerti raggae à De André, da-a dimonstraçion do “Bacco zeneise” à l’esecuçion do “Basso de Zena”, fin a-i gii guiddæ pe-a çittæ vegia. Sensa ascordâse do cabaret.

Do Festival n'an scrito La Stampa e Il Secolo XIX in italian e in zeneise, e anche Telenord.

 

 

Parlo ciæo

Parlo Ciaeo

da-i meixi de frevâ 2015 assemme a-o cotidian ligure o ciù importante - Il Secolo XIX - tutte e domeneghe sciòrte unna pagina con di articoli in zeneise e inte seu varietæ. Derê à st’inandio de grande successo, e che o l’è stæto caxon de atre iniçiative, gh’è CLI.

O successo de “Parlo Ciæo” o l’è dovuo a-a seu impostaçion editoiale, che a respegia a vixon de CLI in sciâ lengua da Liguria, saiva à dî, trattâla comme lengua, con affrontâ temi despægi, sensa scazze mai into folclòre. Tra i tanti succesci ottegnui into tempo n’è cao regordâne trei: o libbro “La lingua della Liguria”, ch’o l’è anch’o l’è anæ to axaurio inte meno de trei giorni; l’articolo dedicou a-o prestigio do zeneise inti secoli, che o l’è stæto tra i ciù lezzui do scito web do “Secolo” pe tutto o 2015, e a prmoçion de un gruppo de studdio incarregou de stabilî definitivamente a grafia da lengua zeneise.

 

Parlo ciæo

 

 

Òmai “Parlo Ciæo” o l’è introu à fâ parte de instituçioin liguri, con dâ a-a lengua zeneise unna ribalta e un prestigio reconosciuo da tutti i operatoî e da-a soçietæ.

 

 

Invexendo

Invexendo

o programma radio Invexendo ol’è arrivou ormai a-a tersa stagion. Partio comme unna rassegna de interviste a-i esponenti primmäi da scena muxicale in ligure, o s’è evoluo de maniman inte un programma e satira politica e soçiâ, un ciccinin surrealista.

Presentou da-o Andrea Acquarone e da-o Bartolomeo Iacopone, in arte “I bòbbi”, o l’è stæto inte la’nno 2015 o programma o ciù avvoxou de Radio Gazzarra, a web radio de l’ARCI Liguria, con portâ unn’æxia neuva inte un campo – quello da radio zeneise – into quæ o scilensio assoluo o vëgne interrompio solo da quarche trasmiscion dedicâ a-o magon.
Pe contra, Invexendo o l’è introu inte cæ (e ciù che atro inti telefonin) de gente e ciù despæge, fiña à l’estranxeo, con dimostrâ a poscibilitæ de fâ da satira, de l’umorismo, de l’rionia, sensa vorgaitæ, in mainea neuva, inta nòstra lengua.

 

Progetto Zena 1814

de l’autunno do 2015, pöco dòppo i duxent’anni d-a perdia del ‘indipendensa da Liguria, CLI a l’à produto un zeugo da töa e un libbro pe riportâ a-a conscensa da çittadinansa quello avvenimento de importansa prommäia.

Zena 1814 - o zeugo     Zena 1814 - o libbro

 

Fruto do travaggio e da fantaxia de Andrea Acquarone, Alberto Barbieri e Luigi Cornaglia, o libbro e o zeugo son stæti presentæ ben ben de vòtte, da-a primma offiçiâ da-a Feltrinelli à Zena, a-a grande presentaçion de CLI a-o Paxo, inte scheue, e in diverse atre occaxoin. Libbro e zeugo son oua comme oua in commerçio inte libbraie e inte bitteghe de zeughi; da-a Feltrinelli s’attreuvan delongo.

Inte sto mòddo, graçie a-a canâ ludico e à quello da divulgaçion, un tòcco bello ancio da popolaçion ligure o l’à repiggiou a memöia istòrica da grande ingiustiçia subia do 1814. Unna primma pria inte l’edifiçio da seu ricompoxiçion a l’è stæta missa.

 

Dagghe unna botta

Laboratöio Dagghe unna bòtta

Pe doe stagion, tra o 2013 e o 2015, tutti i mätesdì seia à l’oa de l’aperitivo o l’è anæta in scena, a-o bar di Giardini Luzzati à Zena o DNB Lab, corso de zeneise pe imprende à parlâ e à scrive.

 

Into tempo 40 persoñe pöcassæ an parteçipou a-i incontri, quarchiduña partindo da zero, atre con imparâ à scrive o rinfrescando a seu conoscensa, graçie a-a conversaçion sviluppâ in mainea interattiva, segondo e dinamiche do laboratöio.
Do 2014 o corso o l’àaiva produto a traduçion corâ da Parte Primma do Jonathan Livingston Seagull; in atteisa de repiggiâ o laboratöio – ò de reprodulo inte di atri pòsti da Liguria – sto chì o l’arresta comme un resultato ottegnuo, in ciù à l’avei avvexinou dexeñe de persoñe à l’esprrescion autòctona do nòstro Paise.

https://www.youtube.com/watch?v=d4-Jf-GpSIU

 

 

Zeneise à scheua

Inte l’anno scolastego 2014-2015 CLI a l’è intrâ inte scheue con un progetto pilòtto che o porrià ëse replicou in atri contesti, con portâ o zeneise tra i banchi con un scistema innovativo: a reçitaçion corâ de unna föa in zeneise. Inte sto mòddo i figgeu de doe quinte elementari da “X Divembre” de Zena an vinto a timidessa e se son avvexinæ a-a fonologia zeneise, ch’a l’è a cösa a ciù importante se mai da grendi se voesse repiggiâ a lengua areo.

 

Lengua ligure in sciô schermo

Into biennio 2015-2016 l’è stæto realizzou de ripreise che portian à un documentäio in sciâ Liguria in lengua ligure. Chì de sotta un breviscimo teaser.

https://www.youtube.com/watch?v=2ZP-0rusnng&feature=youtu.be

Prima coneferenza del ciclo "La lingua della Liguria in sciâ mæña"

 

Conferense e incontri

Oltre a-e iniçiative pubriche, l’attivitæ de CLI a s’è sviluppâ inte unna serie de incontri soçiæ e de conferense, tegnue inti ambienti i ciù despægi, da-i Rotary a-o CSOA Pinelli. Particolâ importansa a l’à avuo a conferensa tegnua a-o Castello do Portixeu de Nervi, perché a l’à inaugurou unna serie de conferense menscili in zeneise sotta o nomme de “La Lingua della Liguria in sciâ mæña”, ch’a dua da-o marso do 2016.

 

O prescidente Acquarone o l'à parlou dapeu a-o Festival de Mare Nostrum à Rapallo, mentre che o mæximo Acquarone e o Fabio Canessa an tegnuo unna leçion plenäia a-o Liceo Lanfranconi de Pegi.

 

 

Gio in scî sciti de Zena 1814

 

Un grande successo, da ripete, a l’è stæto ascì a bira inti caroggi inandiâ in conlaboaçion con l’Associazione Giano, do dexembre do 2015,  coninterventi di doî prescidenti, o Antonio Figari pe Giano, ch’o parlava italian, e o Andrea Acquarone pe CLI, che o palrava zeneise e o lezzeiva di tòcchi de lettiatua ligæ pe temi a-i pòsti che s’ea derê à vixitâ; tanto che o Luigi Cornaglia o spiegava l’ambientaçion do zeugo da töa, caxon de l’incontro.

 

 

 

 

Plenaia

 

A l’arresta istòrica a primma trovâ plenäia di sòcci de CLI, do marso do 2016 à San Bertomê de Söi, chelinsien de tutta a Liguria s’en riunii, comme pe spantegâ a semmensa do “Repiggio”.